Өмнөговь аймгийн төв Даланзадгад суманд энэ сарын 22-оос эхлэн бага ангийн хүүхдүүдийг цахим, танхим хослуулж сургалт явуулахаар боллоо. Тус сумын Онцгой комиссын мэдээлснээр сургууль, цэцэрлэгийн захиргаанаас эцэг, эхчүүдээс авсан санал асуулга болон сумын ЗДТГ-аас иргэдээс цахимаар авсан тандалтын санал асуулгын олонхийн саналд тулгуурлан Даланзадгад сумын Онцгой комиссын 2021 оны 17 дугаар хуралдаанаар хичээл сургалтыг дараах байдлаар зохион байгуулахаар шийдвэрлэсэн байна.

Үүнд:

1. Даланзадгад сумын ЕБС-ийн бага ангийн сургалтыг 2021 оны 11 сарын 22-ны өдрөөс эхлэн 5+9 буюу цахим, танхим хосолсон хэлбэрээр хичээллүүлнэ.

2. ЕБС-иудын хичээл сургалтын үйл ажиллагаа танхимаар орохтой холбогдуулан бага насны хүүхэд гэртээ харах хүнгүй үлдэх эрсдэлээс сэргийлж, цэцэрлэгүүд 2021 оны 11 сарын 22-ны өдрөөс танхимаар үйл ажиллагаагаа явуулах бөгөөд эцэг, эхчүүд өөрсдийн сонголтоор танхимын сургалтад хүүхдээ хамруулна. 2 болон 24 дүгээр цэцэрлэгүүд засварын ажил дуусангуут танхимаар үйл ажиллагаагаа явуулна.