Өмнөговь аймгийн Цогтцэций сумын Т.Борын нэрэмжит Нэгдүгээр  сургуулийн тааз нурж, есөн настай хүү бэртэж, толгойдоо оёдол тавиулсан байна. Одоогоор хохирогч хүүг аймгийн нэгдсэн эмнэлэгт эмчилж байгаа аж. 

Бид энэ талаар тус аймгийн Засаг Даргын Тамгын Газар (ЗДТГ)-ын хэвлэл олон нийттэй харилцах албанаас тодруулахад "Одоогоор улсын байцаагчид ажиллаж, сургуулийн барилгыг цаашид ашиглах боломжгүй гэсэн дүгнэлт гаргасан. Тааз нурсны улмаас нэг хүүхэд бэртэж, эмнэлэгт хандсан. Хөнгөн гэмтэл гэж оношлогдоод одоогоор ажиглалтад байгаа" гэсэн тайлбар өглөө.

Харин нэрээ нууцлахыг хүссэн эх сурвалжийн мэдээлснээр тус сургуулийн хана цуурч, нуралт үүссэн тул зарим эцэг эхчүүд хүүхдээ явуулахаас татгалзаж байв. Тус сургуульд 1,500 орчим хүүхэд хоёр ээлжээр хичээллэх хуваарьтай аж.